فه‌رمانگه‌ی په‌یوه‌ندییه‌کانی ده‌ره‌وه‌
حكومه‌تی هه‌رێمی كوردستان
TUE, 14 JUL 2020 14:27 Erbil, GMT +3
Source: KRG-DFR DFR publication date: SUN, 4 AUG 2019 13:35
نێچیرڤان بارزانى: كوردستان و ئێزدى لێك جیا ناكرێنه‌وه‌


ده‌قى وتارى به‌ڕێز نێچیرڤان بارزانى سه‌رۆكى هه‌رێمى كوردستان له‌ ڕێوڕه‌سمى یادى ڕۆژى جینۆسایدكردنى ئێزدییاندا.

كه‌سوكارێت جانگۆرى و قوربانییێت ئێزدى،

مێهڤان و ئاماده‌بوویێت هێژا..

ڕۆژا وه‌ باش، هوین هه‌مى ب خێر هاتن.

ئه‌ڤڕۆ ب ڕێز و شكۆدارى ئه‌م قوربانى یێت ئێك ژ مه‌زنترین تاوانێت دژى مرۆڤاتیێ ب بیر تینین، كو هیچ كه‌سه‌كى باوه‌ر نه‌دكر دێ د سه‌دسالا بیست و ئێكێدا تاوانه‌كا هنده‌ دڕنده‌ و نه‌مرۆڤایه‌تی ببینیت! ئه‌م خۆ لبه‌ر گیانێ پاقژێ جانگۆرییێت كۆمكوژییا ئێزدیا دچه‌مینین، سلاڤ و دروودا بۆ گیانێ وان تنێرین. ئه‌و چ جارا ژبیرا مه‌ ناچن، هه‌تاهه‌تا دێ مینن به‌شه‌ك ژ بیردانكا نیشتمانییا هه‌ڤبه‌ش یا هه‌می گه‌لێ كوردستانێ.

ب درێژیا دیرۆكێ، ئێزدییا گه‌له‌ك فه‌رمان و كاره‌سات و تالى و زه‌حمه‌تى دیتینه. مه‌ردانه‌ به‌ڕه‌ڤانى ل خۆ كریه‌ و ب سه‌ر و مالێ خۆ، دین و باوه‌ڕیا خۆ یا ئۆلى و زمان و كولتوور و عورف و عاده‌تێت خۆ پاراستینه‌. گیانێ خۆ یێ دایه‌، لێ چ جارا ڕاده‌ست نه‌بووینه‌ و دین و باوه‌ڕیا خۆ چ جاره‌كێ به‌ردنه‌دایه‌. دڤێ ڕێكێدا گه‌له‌ك قوربانى یێت مه‌زن داینه‌. ئه‌م ب ڕێز و پێزانین ئه‌ڤڕۆ لبه‌ر ئیراده‌ و گیانێ به‌ڕه‌ڤانى و خۆپاراستنا ئێزدییا ڕادوه‌ستین و به‌ژنا خۆ دچه‌مینین.

 

دگه‌ل هه‌مى فه‌رمان و كاره‌ساتێت ب سه‌رێ وان هاتى، دیسا ژى ئێزدى وه‌ك نموونه‌كێ زندى یێ كولتوورا پێكڤه‌ژیانێ دگه‌ل پێكهاتێت دى یێت كوردستانێ، ل ڤى وه‌لاتى، له‌سه‌ر ئاخا باب و كالێت خۆ ماینه‌ و بۆ هه‌تاهه‌تا ژى سه‌ربلند و سه‌رفراز دێ لسه‌ر ڤێ ئاخێ مینن. دێ مینن و دێ لالشا نوورانى و میرگه‌ها شه‌رفه‌دین پارێزن، كوردستان ژى هه‌ر دێ مینیت وارێ پێكڤه‌ژیانێ و مالا هه‌مى پێكهاتێت دینى و یێت نه‌ته‌وه‌یى دڤی وه‌ڵاتی دا.

كوردستان و ئێزدى چ جارا ناهێنه‌ ژێك جداكرن. ئێزدى د قه‌وله‌كێ خۆدا دبێژن:

ئه‌م ئێزدینه‌

سه‌رناڤێ سلتان ئێزینه‌

ب ئۆل و ئه‌ركانێت خۆ دڕازینه‌..

جابێ بده‌نه‌ كوردستانێ

بلا قایم كه‌ن ئیمانێ

شه‌رفه‌دین میره‌ ل دیوانێ..

 

جینۆسایدا كو داعشێ ب سه‌رێ ئێزدیا ئیناى، د دیرۆكێدا تشته‌كێ كێم وێنه‌یه‌. ڕۆژێت ئێكێ یێت هێرشێ، (1293) ژن و مێر و زارۆك جانگۆرى بوون و هه‌مى د گۆڕێت بكۆمدا هاتنه‌ ڤه‌شارتن. هه‌تا نهۆ (80) گۆڕێت بكۆم و ب ده‌هان گۆڕێت یه‌ككه‌سى هاتنه‌ دیتن. (2745) زارۆك ئێتیم و سێوى مان. (3548) ژن و كچ، (2869) زه‌لام و كوڕ هاتنه‌ ڕه‌ڤاندن. دۆرێ (360) هزار ئێزدییا ئاواره‌ بوون. (68) مه‌زار هاتنه‌ په‌قاندن. پترى (100) هزار ئێزدییا كۆچبه‌رى دنیایێ بوون.

ئه‌ڤه‌ یه‌ك ژ مه‌زنترین هێرشێت سه‌ر كوردستانێ و فه‌رمانێت ئێزدیایه‌. ئێك ژ ڕه‌شترین به‌رپه‌ڕێت دیرۆكا كوردستانێ و مرۆڤاتیێ یه‌. لێ دیسا ژى هه‌مى كاره‌سات و فه‌رمانێت كو هاتیه‌ سه‌رێ ئێزدیا د دیرۆكێدا، نه‌شیانه‌ و چ جارا ژى نه‌شێن، ئێزدیا و كوردستانێ ژێك جدا بكه‌ن. ئێزدى ئێك ژ كه‌ڤنترین پێكهاتێت وه‌ڵاتێ مه‌نه‌‌. زه‌حمه‌ت و كه‌دا ئێزدییا د ئاڤاكرن و پاراستنا ڤى وه‌لاتیدا،‌ قوربانى و فیداكاریا وان بۆ ڤێ ئاخێ، گه‌له‌كا مه‌زنه‌ د دیرۆكێدا.

ئه‌م گه‌له‌ك باش ده‌رد و ژان و تالیێت ئێزدیا دزانین. ئه‌م باش دزانین ژیانا پێنج سالا د كه‌مپێت ئاواره‌ییێدا چه‌ندا زه‌حمه‌ته‌. ئه‌م دزانین و دبینین كانێ كۆچبه‌رى و جدابوونا ژ مالباتێ چه‌ندا ب ئێش و ژانه‌. ئه‌م باش پێ دحه‌سیێن و مه‌ هاى ژ ڕۆندك و گرى و نالینا دایكێت خۆ یێت ئێزدى هه‌یه‌. ئه‌م دزانین ب دلێ تژى حه‌سره‌ت و كول و كۆڤان، چاڤێ وان یێ ل ڤه‌گه‌ڕا عه‌زیز و خۆشتڤى یێت خۆ. ئه‌م دزانین كو برینا ئێزدیا گه‌له‌كا كویره‌ و ب ساناهى ده‌بار نابیت!

لێ گه‌لى خوشك و برا، ئه‌م گه‌له‌ك و گه‌له‌ك باش وێ ڕاستیێ ژى دزانین كو ئارمانج و مه‌ره‌ما دوژمنا، بێ ئومێدكرن و ده‌رخێستنا ئێزدیا ژ ئاخ و وه‌لاتێ وان یێ باب و كالا و تێكدانا پێكڤه‌ژیانا خه‌لكێ كوردستانێ یه‌! وا دڤێت ئێزدى له‌سه‌ر ئاخا خۆ نه‌مینن! وان دڤێت ئێزدی ده‌ربده‌ری دنیایێ ببن، بێكه‌س و بێخودان بن، ده‌ربده‌ر و كۆچبه‌رى دنیایێ ببن. كۆك و زمان و كولتوور و ئۆلا خۆ بهێلن و ژبیر بكه‌ن!

لێ ئه‌م دێ هاریكار بین و دێ هه‌مى پشته‌ڤانیێ كه‌ین داكو خه‌لكێ مه‌یێ ئێزدى ل وه‌لات بمینن، ل وه‌ڵاتێ خۆ و ل كوردستانێ، لبه‌ر سیبه‌را لالشا نوورانى و میرگه‌ها شه‌رفه‌دین بمینن. پشتڕاستى و باوه‌رى بۆ وان ڤه‌گه‌ڕیت. كۆكا ئێزدیاتیێ ل ڤى وه‌لاتى، لسه‌ر ڤێ ئاخێ یه‌! ئێزدیاتى لێره‌، ل لالشا نوورانى ل میرگه‌ها شه‌رفه‌دین، ل شێخان و ل شه‌نگالێ دێ مینیت و دێ هێته‌ پاراستن. ئێزدیاتى، شه‌نگال، لالش و شه‌رفه‌دین، چ جارا ناهێنه‌ ژێك جداكرن. ئێزدیاتى چ جارا ل وه‌لاتێت بیانى و ل كۆچبه‌ریێ ناهێته‌ پاراستن.

گه‌لى خوشك و برایێت ئێزدى،

هه‌ر ژ ده‌سپێكا كاره‌ساتا شه‌نگالێ، مه‌ كار و هه‌ولدان بۆ هاریكاریا خه‌لكێ خۆ یێ ئێزدى ده‌ست پێكر. ل دهۆكێ د ڕۆژێن ئێكێدا ئه‌م دگه‌ل ڕه‌حمه‌تیێ میر ته‌حسین به‌گ میرێ ئێزدیا، جڤاتا ڕووحانى و كه‌ساتیێت ئێزدى ڕوینشتین و مه‌ گوهداریا گل و گازن و داخاز و پێویستى یێت وان كر. مه‌ ئۆفیسه‌كا تایبه‌ت بۆ ڕزگاركرنا دایك و خوشك و برایێت مه‌یێت ئێزدى ئاڤا كر.

 

هه‌تا ئه‌ڤڕۆ (2225) ژن و كچ، (1284) زه‌لام و كوڕ هاتینه‌ ڕزگاركرن. هێشتا ژى چاره‌نڤیسێ (1323) ژن و كچا و (1585) زه‌لام و كوڕا نه‌دیاره‌. لێره‌، جاره‌كا دی ئه‌م هه‌مى خوشك و برایێت ئێزدى پشتڕاست دكه‌ین كو چ پێویسته‌ دێ كه‌ین، داكو ڕه‌ڤاندى یێت مایى ژى بێنه‌ ڕزگاركرن، یان ژى چاره‌نڤیسێ وان بێته‌ دیاریكرن. گه‌له‌ك سپاس بۆ كار و هه‌ول و ماندیبوونا ئۆفیسا ڕزگاركرنا ڕڤاندیا و بۆ خزمه‌تا وان كری و به‌رده‌وام ژی دكه‌ن.

خوشك و دایكێت مه‌ یێت ئێزدى یێت كو ژ ده‌ستێ داعشێ ڕزگار بووى، سیمبۆلا مه‌زلوومیه‌تێ و شه‌ره‌ف و سه‌ربلندییا ملله‌تێ مه‌نه‌‌. دڤێت ڕێز و پێزانین و جهێ وانێ تایبه‌ت دناڤ جڤاكێدا هه‌بیت. هه‌م حكوومه‌تا هه‌رێما كوردستانێ و هه‌م حكوومه‌تا عێراقێ ژی، هه‌م ژى جڤاكا ناڤنه‌ته‌وه‌یى، دڤێت زێده‌تر هاریكاریا وان بكه‌ن داكو بشێن جاره‌كا دى ده‌ست ب ژیانه‌كا نۆرمال بكه‌ن لسه‌ر خاكا پیرۆزا خۆ.

بڕیارا په‌رله‌مانێ كوردستانێ یا دوهى كو ڕۆژا (3)ى ته‌باخێ وه‌ك ڕۆژا جینۆسایدا ئێزدییان ناساند، بڕیاره‌كا گرنگه‌. ل عیراقێ و له‌سه‌ر ئاستا ناڤنه‌ته‌وه‌یى ژى تڤیا ئه‌ڤ كاره‌ساته‌ وه‌كى جینۆساید بێته‌ ناسین. بۆ ڤێ چه‌ندێ مه‌ به‌رێ ل هه‌رێما كوردستانێ لیژنه‌یه‌كا حكوومى چێكر داكو لسه‌ر ڤێ پرسێ و له‌سه‌ر بابه‌تێ گۆڕێت بكۆم كار بكه‌ت و هه‌مى هاریكاریا پێویست پێشكێشى UN و ئالییێت ناڤنه‌ته‌وه‌یى بكه‌ت. ئه‌م ب هه‌مى شیانێت خۆ دێ له‌سه‌ر ڤان هه‌ولا به‌رده‌وام بین. دڤێت دادپه‌روه‌رى جهێ خۆ بگریت و ئێزدى بێنه‌ قه‌ره‌بووكرن.

شه‌نگال و ده‌ڤه‌رێت دى یێت ئێزدییا پێدڤى ئارامى و ئاڤه‌دانكرن و خزمه‌تێنه‌. هه‌ر دڤێ ده‌مێدا ژى ئه‌و كارێ كو جه‌نابێ كه‌ریم خان ل UN ئه‌نجام دده‌ت، ئه‌م به‌رز دنرخینین و ئه‌م ته‌ئكید دكه‌ین كو حكوومه‌تا هه‌رێما كوردستانێ و سه‌رۆكایه‌تییا هه‌رێمێ دێ پشته‌ڤانییه‌كا ته‌مام كه‌ت بۆ كارێت كو ئه‌و ئه‌نجام دده‌ت و هیڤیدارم ڕۆژه‌كێ ببینین دادپه‌روه‌رى بهێته‌ جیبجیكرن. خه‌لكێ شه‌نگالێ و ده‌ردۆرێت وێ، هێژایى ژیان و سه‌ره‌ده‌رى و ڕه‌وشه‌كا باشترن. ئالۆزى و ململانێ و ناكۆكییێت حزبى و گرووپێت چه‌كدار، تڤیا نه‌بنه‌ ئه‌گه‌رێ نائارامى و ئاڤه‌داننه‌بوونا شه‌نگالێ. ئه‌و، ئێدى ژ كامپا و خیڤه‌تا وه‌ستیان و تڤیا بشێن بێ ئاسته‌نگ، بێ ئاریشه‌، ئارام و سه‌ربه‌ست جاره‌كای دی ڤه‌گه‌ڕنه‌ سه‌ر جهـ و وارێت خۆ.

ئێزدى بگشتى و شه‌نگالى بتایبه‌تى، تڤیا باشترى هه‌مى خه‌لكێ دى، حیسابا به‌رژوه‌ندیا خۆ و باژێڕ و ده‌ڤه‌رێت خۆ بكه‌ن و نه‌هێلن، ده‌لیڤێ نه‌ده‌ن به‌رژه‌وه‌ندیێت حزبی و گرووپێت دی، ببنه‌ ڕێگرێت ته‌ناهى و ئاڤه‌دانكرنێ و خزمه‌تگوزاریا و ڤه‌گه‌ڕیانا خه‌لكى بۆ سه‌ر مال و حالێت خۆ. باوه‌ریا مه‌ ئه‌وه‌، به‌رده‌وام ژى دێ كار كه‌ین كو شه‌نگال ببیته‌ پارێزگه‌هـ.

حكوومه‌تا هه‌رێما كوردستانێ و حكوومه‌تا فیدرالا عیراقێ تڤیا لسه‌ر ڤێ مژارێ هه‌ماهه‌نگ و هاریكار بن و چاره‌یه‌كێ بۆ ڕه‌وشا شه‌نگالێ ببینن. داخازێ دكه‌م كو سندۆقه‌كا ئاڤه‌دانكرنێ بۆ شه‌نگالێ و سنوورێ وێ ده‌ڤه‌رێ بێته‌ ئاڤاكرن و UN و جڤاكا ناڤنه‌ته‌ویى، عێراق و هه‌رێما كوردستان ژى ئاماده‌یه‌ به‌شداریێ تێدا بكه‌ت. هه‌روه‌ها حكوومه‌تا عێراقی ب تایبه‌تی د بوجه‌یا ساڵا بهێتدا دڤێت گرنگییه‌كا تایبه‌ت ب ئاڤه‌دانكرنا شه‌نگالێ و ده‌وروبه‌رێ وێ بده‌ت.

دویماهیێ، جاره‌كا دى، سلاڤ و دروود بۆ گیانێ جانگۆرى یێت جینۆسایدكرنا ئێزدیا و پێشمه‌رگێت قه‌هره‌مان و خۆبه‌خش و هه‌می شه‌هیدێت كو بۆ ڕزگارییا شه‌نگالێ و ده‌ڤه‌رێت دی یێت كوردستانێ گیانێ خۆ كریه‌ گۆری.

گه‌له‌ك سپاس بۆ خه‌لك و ئیدارا پارێزگه‌ها دهۆكێ و جه‌نابێ پارێزگاری كو خه‌لكێ ده‌ڤه‌را دهۆكێ ده‌ریێ مال و مزگه‌فت و قوتابخانێت خۆ بۆ ئاوارێت ئێزدی ڤه‌كرن و هاریكارییا وان كر و تابلۆیێ پێكڤه‌ژیان و پێكڤه‌بوونێ و جاره‌كا دی بۆ جیهانێ نیشان دای، ئه‌ز لێره‌ جاره‌كا دی سپاسیا هه‌می خه‌لكێ دهۆكێ دكه‌م بۆ ڤێ چه‌ندێ.

هه‌ر ب ڤێ هه‌لكه‌فتنێ سپاسیا به‌شدارییا هه‌می نوێنه‌رێت وه‌ڵاتێت بیانی دكه‌م دڤێ ڕێوڕه‌سمێدا، بتایبه‌تی سپاس بۆ به‌شداریكرنا خانما جێنین پلاسخارت نوێنه‌را سكرتێرێ گشتی یێ نه‌ته‌وه‌یێت ئێكگرتی ل عێراقێ د ڤێ ڕێوڕه‌سمێدا.

هه‌ر وه‌كى قه‌وله‌كێ دى یێ ئێزدییا دبێژیت:

یا سوارێ ڕۆژهه‌لاتێ و ڕۆژئاڤایێ

تو بده‌یه‌ خاترا دۆتێ و دایێ

تو مه‌ خلاس كه‌ى ژ قه‌دایێ

ژ به‌لایێ .. ژ غه‌لایێ

گه‌له‌ك سپاس.

ب خێر بێن.

 




مەسرور بارزانی، سەرۆكی حكومەتی هەرێمی كوردستان لە رێوڕەسمی دانانی بەردی بناغەی شەقامی 100 مەتری لە سلێمانی رایگەیاند "شەقامی 100 مەتری سلێمانی، یەكێكە لە پڕۆژە هەرە گەورە و ستراتیژیەكانی حكومەت بۆ شاری خۆشەویستی سلێمانی و خەڵكی سلێمانی شایەنی پڕۆژەی زیاترن".
SAT, 11 JUL 2020 17:08

ئەمڕۆ شەممە 11/7/2020 مەسرور بارزانی سەرۆكی حكومەتی هەرێمی كوردستان، بە ئامادەبوونی قوباد تاڵەبانی جێگری سەرۆكی حكومەت و ژمارەیەك وەزیر و پارێزگاری سلێمانی، بەردی بناغەی شەقامی 100 مەتری سلێمانی دانا.

 
سەفین دزەیی: نوێنەرایەتی لە تورکیا و هەندێ لە وڵاتانی عەرەبی و ئاسیا دەکەینەوە
FRI, 10 JUL 2020 21:44

سەفین دزەیی، بەرپرسی فەرمانگەی پەیوەندیەکانى دەرەوەی حکومەتی هەرێم لە لێدوانێکدا لە بارەى تێپەڕبوونی ساڵێک بەسەر تەمەنی کابینەی نۆیەمی حکومەت و کاروچالاکییەکانی بە کوردستان24ـی راگەیاند، سەرەڕای بەربەست و قەیرانەکان، حکومەت هەنگاوی زۆر باشی بۆ بەهێزکردنی پەیوەندییەکانی ناوە.

 
ئەنجومەنی وەزیران گفتوگۆ دەربارەی سیستەمی بایۆمێتری و گرفتەکانی کەرتی کشتوکاڵ دەکات
WED, 8 JUL 2020 21:00

ھەولێر، ھەرێمی كوردستان، عێراق (GOV.KRD)- ئەمڕۆ چوارشەممە ٢٠٢٠/٧/٨ ئەنجومەنی وەزیرانی هەرێمی کوردستان بە سەرپەرشتی مەسرور بارزانی سەرۆکی وەزیرانی هەرێمی کوردستان و بەشداربوونی قوباد تاڵەبانی جێگری سەرۆک وەزیران، لە ڕێگەی ڤیدیۆ کۆنفرانسەوە کۆبووەوە.

 

 

بەبۆنەى کۆچى دوایى کونسوڵى میسر لە هەرێم، سەفین دزەیى نامەیەکى هاوخەمى ئاراستەى وەزیرى دەرەوەى کۆمارى میسرى عەرەبى کردو پەیوەندیەکى تەلەفۆنى لەگەڵ باڵیۆزى میسر لە بەغدا ئەنجامدا

MON, 13 JUL 2020 21:00

ئەمڕۆ دووشه‌ممه‌ 13/7/2020 به‌ڕێز سەفین دزەیى بەرپرسى پەیوەندیەکانى دەرەوەى حکومەت پرسه‌نامه‌یه‌كى ئاراسته‌ى به‌ڕێز د. سامح شوکرى وەزیرى دەرەوەى کۆمارى میسرى عەرەبى کرد، تێیدا پرسەو سەرەخۆشى خۆى ئاراستەى بەڕێزیان کرد بەبۆنەى کۆچى دوایى باڵیۆز ئه‌حمه‌د جیهاد سعید حارس كونسولى كۆمارى میسرى عه‌ره‌بى له‌هەرێمى کوردستان، کە دوێنێ بە نەخۆشى لە قاهیرەى پایتەختى میسر کۆچى دوای کرد. وێڕاى بەرز نرخاندنى رۆلى خوالێخۆشبوو لە پتەوکردنى پەیوەندیەکانى نێوان هەردوولا، هیواى خواست خواى گەورە سەبرو ئارامى بە دۆستان و خانەوادەو کەسوکارى ببەخشێت و جێگەى بەهەشتى بەرین بێت.

 

سه‌رۆك نێچیرڤان بارزانى سه‌ره‌خۆشى له‌ سه‌رۆك ئه‌لسیسى ده‌كات

SUN, 12 JUL 2020 21:36

ئه‌مڕۆ یه‌كشه‌ممه‌ 12/7/2020 به‌ڕێز نێچیرڤان بارزانى، سه‌رۆكى هه‌رێمى كوردستان پرسه‌نامه‌یه‌كى ئاراسته‌ى به‌ڕێز عه‌بدولفه‌تاح ئه‌لسیسى، سه‌ركۆمارى میسر كرد، تیایدا بۆ كۆچى دواییى خوالێخۆشبوو ئه‌حمه‌د حارس كونسولى كۆمارى میسرى عه‌ره‌بى له‌ هه‌ولێر، سه‌ره‌خۆشى له‌ به‌ڕێزیان كرد و هاوخه‌میى خۆى بۆ له‌ده‌ستدانى خوالێخۆشبوو ده‌ربڕى كه‌ دوێنێ له‌ میسر كۆچى دوایى كرد.

 

فەرمانگەى پەیوەندیەکانى دەرەوەى حکومەت بە بۆنەى کۆچى دوایی کونسوڵى میسڕ لە هەرێم باڵیۆز ئەحمەد جیهاد سەرەخۆشى لە خانەوادەو ستافى کونسوڵگەرى و باڵیۆزخانەى میسڕ لە عیراق و وەزارەتى دەرەوەى میسڕ دەکات

SUN, 12 JUL 2020 21:29

بەداخەوە ئەمڕۆ وەزارەتى دەرەوەى کۆمارى میسڕى عەرەبى رایگەیاند کونسوڵى میسر لە هەرێمى کوردستان باڵیۆز ئەحمەد جیهاد سەعید حارس بە هۆى نەخۆشى لە قاهیرەى پایتەختى میسڕ کۆچى دوایی کرد.

 

سەرۆکی حکومەتی ھەرێمی کوردستان سەرپەرشتی کۆبوونەوەیەکی تایبەت بە چاکسازییەکانی وەزارەتی پێشمەرگە دەکات

SUN, 12 JUL 2020 17:29

ھەولێر، ھەرێمی كوردستان، عێراق (GOV.KRD)- ئه‌مڕۆ یه‌كشه‌ممه‌ ٢٠٢٠/٧/١٢ مه‌سرور بارزانى سه‌رۆكى حكومه‌تى هه‌رێمى كوردستان له‌ ڕێگەی‌ ڤیدیۆ كۆنفرانسه‌وه‌ ، سه‌رپه‌رشتى كۆبوونه‌وه‌یه‌كى تایبه‌ت به‌ پرۆسه‌ى چاكسازى له‌ وه‌زاره‌تى پێشمه‌رگه‌ كرد.